Zevendesime i posteve ne demokracite me te reja

[goni]

Intervistë e Nexhat Dacit në Gazetën "EXPRESS"

INTERVISTË ME NEXHAT DACIN PAS SHKARKIMIT NGA KRYETARI I KUVENDIT TË KOSOVËS


Intervistuan : Arlinda Desku dhe Berat Buzhala, Brezovicë, 2 mars 2006

Express: Kryesia e LDK‘së ju shkarkoi nga posti i Kryetarit të Kuvendit, kurse ju po rrini i mbyllur këtu në vilën tuaj në Brezovicë. Po mendoni në qetësi, si t‘ia bëni tutje?


Nexhat Daci: Po. Unë po e shfrytëzoj një përvojë shumë të vjetër. Gjithmonë, në momente të vështira, kur më duhet të mendoj, unë tërhiqem, izolohem. Unë kam ardhur këtu në pushim. Për këtë e kam informuar Kryetarin e Kosovës, Fatmir Sejdiun. I kam thënë se më duhet një javë pushim, sipas këshillave të mjekut, por për takime të rëndësishme mund të kthehem. Të mërkurën u ktheva në Prishtinë tërësisht i papërgatitur për atë që ndodhi. Kur hyra në kabinet, erdhën këshilltarët. Pash se nuk e kishin çehren e mirë. Pastaj, ma komunikuan lajmin. Nuk u ndjeva mirë. Ishte befasi. Për nja tre minuta ktheva filmin e kohërave shumë të vështira, në vitin ‘68, ‘72 dhe ‘81.
Më vonë, erdhën Eqrem Kryeziu dhe Naim Jerliu, për të ma komunikuar lajmin. U thashë - nëse LDK merr aso vendime, unë i respektoj. Më duhet të sqaroj diçka. Jam konsumuar në tërësi gjatë ceremonisë së varrimit të Presidentit Rugova. Kishte telashe të brendshme të natyrës së fuqishme politike, jo organizative. Tentohej që të ishte një protokoll familjar dhe asgjë tjetër. Pas fjalës mortore që mbajta në Kuvend, kam ftuar në zyrën time Soren Jessen-Petersen, Philip Goldberg dhe Gjeneralin Valoto,
për të biseduar rreth ceremonisë së varrimit. Aty pash se institucionet nuk kanë pse të involvohen, sepse do të ishte një ceremoni familjare, ndërsa më thanë se Alush Gashi ishte caktuar si përfaqësues i familjes Rugova. U thashë: "Who is Alush?" Dhe, u shpjegova se nuk jemi fis, prandaj duhet të kemi protokoll shtetëror dhe kombëtar. Po bisedonim edhe për ditët e zisë. Duke e njohur natyrën e Presidentit Rugova, duke qenë se ishte properëndimor, thashë se nuk mund të shpalleshin 15 ditë zie, por mjaftojnë vetëm 5.
Megjithatë, e bëmë një protokoll të mirë, që na mori lakmi krejt dynjaja. Por, loja e fëlliqtë dhe kundër traditës kombëtare - ishte ditën e varrimit. Kishim takim me zyrtarët më të lartë europianë, Javier Solana e Oli Rehn. Ishin marrë vesh që aty të fliste Surroi, të bënte biznes aty. Solana dhe Rehn deshën të hynë në kombinatorikën politike. Nuk i lejova, sepse vendi ishte në zi. Ishin minutat e fundit të shtëpisë së Presidentit Rugova në Kuvend, aty ku po qëndronte trupi i tij për nderime, dhe nuk kam lejuar që të ketë atë ditë biznes e as politikë. U ngritën në këmbë. Jessen-Petersen i tha Surroit - "Fol... nise...". Surroi tha - "Si ta nis kur u çua Kryetari...". Dhe, u mbyll ai takim. Unë kam pasur informacion të ndytë kundër meje. Udhëheqësi i delegacionit amerikan në ceremoninë e varrimit, që ishte njeriu i tretë në administratën e Bushit, më tha se SHBA do të bashkëpunojë ngushtë me spikerin e Kuvendit dhe me Kuvendin e Kosovës. Këtë po e them për ta dalluar vijën zyrtare amerikane prej një vije që nuk ka qenë vijë e lidhur burimisht me Shtëpinë e Bardhë.

Express: Dëshironi të thoni se Philip Goldberg nuk i përfaqëson qëndrimet e shtetit amerikan karshi jush?

Nexhat Daci: Jo. Bindjet e thella karshi meje nuk i përfaqëson.

Express: Me çfarë mund ta argumentoni ketë?

Nexhat Daci: E argumentoj me një gjë.Kur është bërë koalicioni LDK-AAK, unë kam pasur kërcënime prej asaj vije. Kërcënime të thjeshta. Në mesin e tyre ka qenë edhe Goldberg. Ai është kërcënuar që të mos bëhet koalicioni dhe në veçanti që Ramush Haradinaj të mos bëhej Kryeministër. Goldberg ka qenë i mirëseardhur gjatë gjithë mandatit, për shkak të respektit që kemi për Amerikën. Për çdo konsultim, ka ardhur në zyrën time dhe në shtëpinë time. Dhe, jam befasuar kur një delegacion amerikan të vijë më kërcënime, për një demokraci që ne po e krijojmë me shumë simpati, e të thoshin – ky bën, ky nuk bën.

Express: Vendimi që u mor të mërkurën për shkarkimin tuaj, është edhe një "shpërblim" që ua dha Ramush Haradinaj?

Nexhat Daci: Nuk e di… Unë për familjen Haradinaj dhe Ramush Haradinajn kam një respekt të veçantë. Në të gjitha tubimet që krijohet historia, e kam përmendur me krenari. Dhe në momentet e tashme, ndoshta duhet një psikoanalizë, për të cilën unë nuk jam ekspert. Unë kam hyrë me një bindje të thelle në atë koalicion.

Express: Megjithatë, ju keni pasur një mbështetje të Soren Jessen- Petersen...

Nexhat Daci: E kam pasur mbështetjen se tij shumë të fuqishme prej takimit të parë kur ka ardhur në Kosovë. Prej atëherë e deri kur ma ka sjellë një letër, të cilën unë nuk ia kam pranuar.

Express: Si ishte puna e letrës?

Nexhat Daci: Ishte punë e lojës së budallenjve. Të m‘i kufizonin të drejtat derisa të jem ushtrues detyre i Presidentit.

Express: Pse punë budallenjsh?

Nexhat Daci: Sepse Goldberg dhe Jessen-Petersen janë dy njerëz të cilëve u kam thënë, shumë kohë para vdekjes së Presidentit Rugova, se unë në asnjë mënyrë nuk do ta zëvendësoj Rugovën. Në atë takim i kam thënë - ju jeni nën presion, prandaj kthejeni atë letër, sepse e di çfarë shkruan aty.

Express: Pra, juve ju kanë njoftuar paraprakisht se çfarë shkruan në atë letër?

Nexhat Daci: Po, e kam ditur se çfarë shkruan në letër, sepse Kosova
është shumë e vogël.

Express: Refuzimi i letrës që i bëtë Soren Jessen-Petersen dhe refuzimi që bëtë në takim me Solanën që të flitet për zgjedhjen e Presidentit, u vlerësuan si sjellje arrogante.Dhe, kjo ju kushtoi, në fund?

Nexhat Daci: Mendoj që jo. Unë jam shkolluar shumë gjatë në universitete perëndimore. Perëndimi kurrë nuk i respekton frikacakët as të dobëtit në shkencë.

Express: E në politikë?

Nexhat Daci: Një gjë e di... me Jessen-Petersen kemi funksionuar dhe funksionojmë me marrëveshje. Nëse kemi telashe, flasim hapur me njëri-tjetrin. Në shumë raste më ka ndihmuar me sinqeritet ballkanik të tij. Ai e ka fituar sinqeritetin tim naiv ballkanik ose shqiptar, por nuk e ka keqpërdorur. E, Solanës ia kam bërë me qëllim. Unë e kam një arrogancë të lindur. Jam rritur që të mos frikësohem.

Express: Por kjo po ju kushton në një moment kulmor të karrierës...

Nexhat Daci: Nuk e besoj. Mendoj se më ndihmon.

Express: Të kthehemi te vendimi i Kryesisë së LDK‘së për t‘ju shkarkuar. Çfarë ndodhi të mërkurën, a e dini z.Daci, a keni farë shpjegimi?

Nexhat Daci: Unë nuk kam qenë në atë mbledhje. Por, nuk jam i befasuar. LDK pa Presidentin e Kryetarin e saj, në strukturën ekzekutive - e ka vështirë të funksionojë. Një strukturë ku askush nuk e ka ditur emrin dhe mbiemrin kur ishin me Presidentin. Jo pse Rugova i ka kërcënuar ndonjëherë, por pse mungesa e cilësisë i ka bërë skllevër. Në LDK nuk ka pasur kurrë diktaturë. Në një moment, kur dikush është ankuar për mungesë të hapësirës, kam thënë - merruni me vetveten. Ibrahim Rugova nuk i ka penguar kurrë. Ai njeri që ka pasur vizion ose kurajo - nuk ka qenë i penguar. Ajo që ka ngjarë të mërkurën në Kryesinë e LDK‘së - ata duhet të merren me vetveten.

Express: Me çfarë arsyetimi erdhën para jush se do t‘ju shkarkojnë?

Nexhat Daci: Me kurrfarë arsyetimi. "Po thotë bashkësia ndërkombëtare që është në të mirën e Kosovës që Kryeministri dhe Kryetari i Kuvendit të shkojnë...."

Express: Eqrem Kryeziu tha se ky është një test demokratik...një deklarim që s‘merrej vesh fort...

Nexhat Daci: Ai me mua nuk ka folur për asnjë test. Po ju them me përgjegjësinë më të madhe. I kam thënë disa parametra të respektit tim ndaj LDK‘së, në momente të vështira. I kam thënë se LDK le ta marrë vendimin, e unë do ta respektoj.

Express:LDK...dhe jo Kryesia e LDK‘së...

Nexhat Daci: Unë flas më precizitet të shkencëtarit. Kur them LDK, flas për struktura. Sipas statutit të LDK‘së, dihet se kush për çka është kompetent. Unë përafërsisht i kam parë lojërat që, mjerisht, pa nevojë, janë bërë me Kryetarin Fatmir Sejdiu, nga e njëjta Kryesi. Fatmir Sejdiu është profesor dhe kam respekt për të. Katër vjet sa ka qenë anëtar i Kryesisë së Kuvendit, asnjëherë nuk kemi pasur mosmarrëveshje. Mbi atë bazë, kam dalë jashtë lëkurës sime dhe e kam përkrahur edhe në kohën e zisë. Por, Kryesia e LDK‘së nuk ka treguar respekt për postin e Presidentit të Kosovës. Në vend se të kishte një takim të dinjitetshëm dhe të merreshin vesh siç duhet. LDK e ka ditur se unë nuk jam kandidat për President. I kam njoftuar.

Express: Si jeni ndier kur e keni parë Eqrem Kryeziun duke folur në media?

Nexhat Daci: Shumë keq. Me ka ardhur keq për të. Me sa di, ai është ligjërues në shkollë të lartë diku. Është kryetar komune, ku në dy mandate i ka humbur zgjedhjet. Dhe, kur e kam parë ashtu, kam thënë: A është mundur, një njeri në moshë, te bjerë aq ultë, që Kryetari i Kuvendit t‘ia dorëzojë dorëheqjen atij ose Kolë Berishës?! Ai moment më është dukur, si në një roman, Foleja e Qyqes... Më është dhimbsur LDK... Kam thënë që duhet bërë gjithçka që shtëpia të konsolidohet.

Express: Ju e keni marrë vesh në media për vendimin,nuk kanë ardhur t‘ua kumtojnë zyrtarisht, pasi është marrë vendimi në Kryesinë e LDK‘së?

Nexhat Daci: Jo. Në media e kam mësuar.

Express: A e keni ndërmend të ofroni dorëheqje?

Nexhat Daci: Jo. Procedura e largimit të Kryetari të Kuvendit merret në Këshillin e Përgjithshëm të partisë, në këtë rast të LDK"së, ose në strukturat ë Kuvendit. Kryesia e LDK‘së nuk e ka asnjë kompetencë të politikës partiake, ajo e ekzekuton.

Express: Pra, ju nuk e njiheni në asnjë mënyrë vendimin që ka marrë Kryesia e LDK‘së?

Nexhat Daci: Është kundër statutit të LDK‘së. Kryesia e partisë asnjëherë nuk zgjedh Kryetar të Kuvendit. Kryetari i LDK‘së me Kryesinë më kanë nominuar mua për Kryetar të Kuvendit. Ata kanë të drejtë ta inicojnë procedurën, jo të marrin vendim. Vendimi duhet të merret në Kuvend. Nuk
ka forcë, as ushtarake, vetëm plumbi, të të tërheqë ndryshe.

Express: Dhe, keni vendosur të mos largoheni pa u përfillur këto procedura?

Nexhat Daci: Jo, nuk e kam ndërmend. Unë jam institucionalist. Institucioni që është përgjegjës me Kornizë Kushtetuese - e kryen atë procedurë. Në atë moment kur Kuvendi, pra Grupi Parlamentar i LDK‘së, e sheh të arsyeshme, me procedurë demokratike, unë do të jemi respektues i madh dhe më i fuqishëm i atij vendimi.

Express: Ju e kaluat një test në Kuvend.LDK ju mbrojti ditën kur u fol për Qendrën Protokollare në Gërmi.Besoni se do të ndodhë e njëjta gjë edhe më këtë rast?

Nexhat Daci: Atë ditë unë e fitova një votëbesim të fuqishëm prej LDK‘së. Për ta lënë LDK që të jetë e lirë, në momentin e votimit, unë s‘kam qenë në sallë. 42 deputetë, në një mënyrë, kanë kërkuar shkarkimin tim. Kur është votuar, vetëm 23 prej tyre kanë votuar "për" formimin e komisionit hetues, pra për shkarkim. Ajo ka qenë përkrahja më e fuqishme që e kam marrë me vota të fshehta. Por, nuk kam pasur asnjë arsye të mendoj të jap dorëheqje. Pse dorëheqje? Në mandatin e dytë, prej 99 deputetëve të pranishëm në sallë, kur Veton Surroi mori fjalën kundër meje në Kuvend, 93 vota kanë qenë "për" zgjedhjen time të dytë. Ishte kundër vetëm OJQ e papërgjegjshme, siç e kam quajtur, e Veton Surroit...

Express: Por kjo "OJQ" ju kushtoi kaq shtrenjtë.... E keni nënvlerësuar këtë "OJQ"...?

Nexhat Daci: Po, është edhe loja e saj. Në takimin e fundit që kishim në Grupin Negociator, me Presidentin Rugova, kam thënë se një ditë do të dalin para mediave për punën e shërbimeve sekrete, por edhe për punën sekrete që një anëtar i delegacionit ( këqyrsha në Surroin) që ka bërë me Kai Eiden, por e ka pranuar edhe në takimin e parë me Ahtisaarin.

Express: Për çfarë punë sekrete e keni fjalën?

Nexhat Daci: Punët sekrete që Kosova nuk është e gatshme... nuk i plotëson standardet, se Kuvendi nuk është demokratik, se Qeveria nuk është efikase... Krejt kjo ka ndikuar në raportin e Kai Eides... Krejt kjo lojë është që Kosova ta paguajë një faturë pak më të trashë.

Express: Gjatë kësaj kohe, prej të mërkurës,a ju kanë kontaktuar zyrtarë të LDK‘së?

Nexhat Daci: Jo. Këtu s‘ka telefon. Jemi larg nja 65 kilometra. Nuk e kam kontaktuar asnjë.

Express: A do të dilni të hënën në punë?

Nexhat Daci: Të hënën, po.

Express: Në zyrën e Kuvendit?

Nexhat Daci: Me emër të Zotit, po.

Express: A jeni të gatshëm të ballafaqoheni me pengesa?

Nexhat Daci: Po.

Express: E nëse Kolë Berisha është në ulësen tuaj?

Nexhat Daci: Jo, nuk mundet. Ai mund ta marrë çdo zyrë. Nuk do të përdor kurrfarë dhune...



Express: Kryesia e LDK‘së vendosi për shkarkimin tuaj.Ky është njoftimi publik që u dha. Por, a e zbatoi ajo një ide të Philip Goldberg? A i ndihmoi kësaj pune edhe AAK e ORA...?

Nexhat Daci: Veton Surroi, kur erdhi në fillim në Kuvend, e pat bërë një pyetje si ju kështu. Dhe, i pata thënë - a po e riformuloni fjalën, a po e tërhiqni krejt. Edhe juve po ju them - a po e riformuloni pyetjen, sepse mua nuk mund të më shkarkojë as Goldberg, as Kryesia e LDK‘së dhe askush tjetër, përveç Kuvendit.

Express: Por Kryesia e LDK‘së e quajti shkarkim... vendim për shkarkim...

Nexhat Daci: Mua nuk mund të më shkarkojë askush tjetër pos Kuvendit.

Express: E kush e bëri këtë,pra? Dikush e nisi. Me vendim të kujt? Me iniciativë të kujt?

Nexhat Daci: Me dëshirën e madhe të njerëzve të Kryesisë së LDK‘së për të ardhur në pozita të Kryetarit të LDK‘së, të Kryetarit të Kuvendit dhe të Ministrit të Punëve të Brendshme.

Express: Nëse atyre nuk u ka ardhur keq që ta marrin këtë vendim, ndoshta edhe juve nuk ju vjen keq që t‘i përmendi me emra...

Nexhat Daci: I keni parë vetë në media... Kolë Berisha, Eqrem Kryeziu dhe Naim Jerliu.

Express: Një natë para se të dalë me këtë vendim Kryesia e LDK‘së, është njoftuar për një takim jopublik mes Philip Goldberg dhe Fatmir Sejdiut, Eqrem Kryeziut e Kolë Berishës. Aty, siç është thënë, është vendosur për ndryshimet në institucione, pra edhe për largimin tuaj...

Nexhat Daci: Unë nuk e di. Prej të shtunës jam këtu në Brezovicë.

Express: Fatmir Sejdiu ka qenë i përfshirë në këtë rrëfim...?

Nexhat Daci: Unë nuk po ju kundërshtoj as nuk po e pohoj, sepse nuk kam qenë në Prishtinë.

Express: Nëse e bëjmë një listë të atyre që ndikuan për largimin tuaj, një listë shkaqesh, si do të dukej ajo?

Nexhat Daci: Unë do të thosha shkaqe të budallenjve, që menduan t‘i bëjnë gjërat me shpejtësi sikur në boks, me knock-out. Nëse bëhet - mirë. Nëse jo - asgjë.

Express: Këto kalkulime janë bërë edhe më herët... Express e ka pasur një tekst me titull "Rrëfimi për rrëzimin e Dacit", i cili po del i saktë. Pra, ka ekzistuar një skenar...

Nexhat Daci: E kam parë atë tekst dhe e kam lexuar me vëmendje. Rrëfimet kanë filluar me hyrjen e ORA‘s në Kuvend. Në mandatin e parë, kur nuk mund të bënim zgjedhjen e Presidentit dhe Qeverisë, e njëjta zyrë me të cilin kam qenë tepër mik, ka ardhur te unë dhe më ka thënë - "Kryeministër po e zgjedhim Veton Surroin"...

Express: Po flisni për Zyrën Amerikane...?

Nexhat Daci: Ishte John Menzies.... dhe... pastaj ma përmendi Blerim Shalën. I kam thënë - "Çfarë lloj demokracie po na sillni? A po mendoni se ne jemi fise? Derisa nuk e fitojnë elektoratin, në zgjedhje, kurrë nuk mund të bëhen. Edhe një herë nëse m‘i përmendni... nuk do kemi më takime".

Express: Ka edhe një tjetër shkak për largimin tuaj.... Afria me Hashim Thaçin.... A po e pranoni se edhe kjo ju kushtoi shumë?
Nexhat Daci: Shumë, shumë. Por, më dëgjoni me vëmendje - atë çmim e paguaj me krenarinë më të lartë.

Express: Afria me Thaçin e largoi edhe zhurmën në Kuvend, jua krijoi "qetësinë vepruese", siç e quani ju...

Nexhat Daci: Nuk e besoj. Disa në Grupin Parlamentar të PDK‘së nuk e dëgjojnë Hashim Thaçin, disa partizanë aty që s‘i kanë dy lidhje... LDK është akademi për partitë tjera.

Express: Dikur ndoshta, jo sot... Tash e bëtë një vlerësim shumë të lartë për LDK‘në, zoti Daci...

Nexhat Daci: Jo, unë them për LDK‘në burimore. Po ju flas për anëtarësinë e gjerë. Nuk po flas për Kryesinë. Ju jeni lidhur për Kryesinë...

Express: Kryesia po i merr vendimet...Si mund të flisni kaq i qetë?

Nexhat Daci: Jo more çfarë vendime... Vendimet nuk i merr askush jashtë LDK‘së. Autoriteti i vetëm është Këshilli i Përgjithshëm. Unë jam i qetë për ta zbuluar vlerën dhe antivlerën në LDK. Kur flas për LDK, nuk e kam me Kryesinë.

Express: A do të provoni ta thirrni ju Këshillin e Përgjithshëm?

Nexhat Daci: Unë s‘kam të drejtë ta thërras. Unë jam anëtar i Këshillit të Përgjithshëm. Ka një nen në statutin e partisë se sa anëtar të Këshillit të Përgjithshëm kanë të drejtë ta thërrasin takimin. Nuk po kërkoj asgjë më shumë - vetëm që të respektohet statuti dhe programi i LDK‘së.

Express: A keni besim në Grupin Parlamentar të LDK‘së?

Nexhat Daci: Grupi Parlamentar ka votuar fshehur për mua, para dy javësh. Nëse i bllokon ndonjë forcë që u kërcënohet, atëherë është tjetër çështje. Por, unë do të shkoj në takimin e Grupit Parlamentar, kur do të flitet dhe vendoset për shkarkimin tim. Grupi Parlamentar duhet të më ftojë mua në mbledhje, sepse unë jam deputet. Dhe, deputetin asnjë parti nuk mund ta shkarkojë. LDK ka obligim statusor dhe kushtetues që të më thërrasë. Unë do të shkoj, sepse e kam obligim. Nëse Grupi Parlamentar voton për shkarkimin tim, atëherë - po - jap dorëheqje. Dhe, prapë do ta vazhdoj punën time në Kuvend si deputet dhe në LDK.

Express: Gjërat,megjithatë,po ndryshojnë çuditshëm. Çfarë nëse ata pranojnë porositë nga jashtë kundër jush?

Nexhat Daci: Nuk e di nëse pranojnë ose jo. Është e drejtë e deputetit të flasë e votojë. Unë do ta pranoj në mënyrën më të sinqertë.

Express:Me gjasë ju keni një bindje se do të jeni edhe më tej Kryetar i Kuvendit....

Nexhat Daci:Po të mos besoja, do të shkoja sot dhe do ta dorëzoja dorëheqjen para cilitdo anëtar të Kryesisë së LDK‘së, ndoshta edhe para atij të Prizrenit... meqë e kam më afër Prizrenin këtu nga Brezovica...

Express: A ka Kryesia e LDK telashe me juve?

Nexhat Daci: Nuk ma merr mendja. Unë nuk jam anëtar i Kryesisë së LDK‘së.

Express: E bashkësia ndërkombëtare? Ju njiheni për arrogancë në qëndrime. Prandaj, nuk duheni tash në kohën e statusit. Po?

Nexhat Daci: Po, kjo qëndron. Para vitit të ri, Goldberg ngriti çështjen që statusi nuk mund të përfundojë pa biseda me Beogradin. I kam thënë - jo, pavarësinë ne nuk e negociojmë, nuk ka pavarësi me kushte. Ia kam bërë të qartë se nuk kam mandat për asgjë tjetër pos pavarësisë së plotë. Atë ditë ka kërkuar mendimin tim për ta ndërruar Bajram Kosumin. Përgjigja ime ishte - jo. Më tha se do të shkonte për konsultime në Washington. Edhe Admirali i NATO‘s Harry Ulrich, kur erdhi të me takojë bashkë me Gjeneralin e KFOR‘it Valoto, m‘i ka paraqitur tri kondita ultimative, si ushtarak. Edhe atij ia kam bërë të qartë se pavarësinë nuk e negociojmë. I thashë se kot humbet energji e kohë për këtë çështje. Të fundit që ia kam përsëritur këtë qëndrim - ishte Frank Wisner. Ishte aty edhe Rosemary Di - Carlo dhe Philip Goldberg. Nuk them që jam i vetmi kosovar që e mbroj pavarësinë, as më i forti e me i mençuri. Por, e ndjej si obligim për të mos e gënjyer popullin.

Express: Për shkak të këtij qëndrimi tuajin,mendoni ju,u bënë edhe këto ndryshime në Grupin Negociator?

Nexhat Daci:Po, mendoj që po. Është kryesorja. Në Grupin Negociator jemi marrë vesh që takimet do të zhvillohen bashkë, e jo individualisht. Ajo që i dhimti më së shumti bashkësisë ndërkombëtare - është ajo që kam thënë – se vendimet përfundimtare për statusin merren në Kuvend, së paku me dy të tretat e votave. Lë të premtojë e të spiunojë çka të dojë Veton Surroi.... Nuk është me rëndësi a është Daci a jo... Normat në Kuvend do të respektohen, ashtu siç jemi marrë vesh. LDK është lëkura ime

Express: A nisi lufta për ndarjen e LDK‘së më ditën e mërkurë?

Nexhat Daci: Nuk e besoj.

Express: Çfarë do të bëni ju?

Nexhat Daci: Unë do të jem kandidat i fuqishëm i LDK‘së, do të jem fuqishëm pro LDK‘së. Do të insistoj që në të gjitha nivelet – të bëhen zgjedhjet në mënyrë demokratike. Dhe, ata që fitojnë besimin prej degëve e deri në kuvend të partisë, ata do të jenë udhëheqës të LDK‘së.

Express: Ju do të jeni në LDK derisa të mbahen zgjedhjet brenda partisë?

Nexhat Daci: Unë do të rri në LDK derisa ta shoh që funksionon demokracia aty në parti.

Express: A ju është lëkundur besimi në këtë parti,tash pas kësaj që ndodhi?

Nexhat Daci: Në asnjë mënyrë.

Express: Por, pas vendimit të Kryesisë së LDK‘së për shkarkimin tuaj - do ta keni të vështirë të bashkëpunoni...

Nexhat Daci: Pas zgjedhjeve të reja, ndoshta asnjë prej 16 anëtarëve mund të mos jetë në Kryesi.

Express: E nëse LDK merr vendim që t‘ju shkarkojë nga posti i Kryetari të Kuvendit,me ato procedura që po i kërkoni, çfarë atëherë?

Nexhat Daci: Nëse LDK merr vendim të më shkarkojë, unë do të mbetem prapë në LDK, deri në zgjedhje. Nëse respektohet demokracia në LDK, kurrë nuk e lëshoj, sepse është lëkurë imja të cilën e ndjej. LDK e kanë lëshuar vlerat me të larta të kulturës, të shkencës. Por, LDK‘së i kam thënë - do të keni problem me mua, sepse unë nuk ua plotësoj atë dëshirë që ta lëshoj LDK‘në.

Express: Ju e keni përmendur shpesh anijen që ecën drejt limanit të pavarësisë. A do t’ju vijë keq nëse nuk jeni në atë anije?

Nexhat Daci: Jo, unë do ta ndihmoj atë anije të mbërrijë në limanin e destinuar, që me Presidentin Rugova e ka përcaktuar Lidhja Demokratike e Kosovës, me të cilin unë gjithmonë kam qenë opozitë konstruktive.

Express: Keni qenë opozitë konstruktive me Ibrahim Rugovën, dëshironi të thoni se keni pasur mendimin tuaj?

Nexhat Daci: Po, me Rugovën. Unë kisha një liri timen të natyrshme. Kur nuk jam pajtuar me diçka, këtë e kam thënë brenda LDK’së.

Express: Kur ka qenë takimi juaj i fundit me Rugovën?

Nexhat Daci: Takimi im i fundit me Rugovën ishte në Grupin Negociator, një takim jo shumë i këndshëm për Veton Surroin. Pas pjesës zyrtare, jemi ulur në zyrën e tij ku i priste mysafirët, për të pirë kafe. Veton Surroi dhe Blerim Shala nisën të flasin për nevojën që të lobohet në Amerikë për çështjen e statusit të Kosovës, që të gjendej dikush për këtë punë. Rugova tha – “Mirë është kjo, mirë është kjo”. E shikova dhe i thashë – “Çka mirë? Çka ka mirë këtu? Pse e kemi Zyrën e Senatorit Doll? Pse e paguajmë? Pse e kemi NAAC atje? Pse e kemi Diogardin? Tash së fundi edhe Behxhet Pacolli ka krijuar lobin për këtë çështje. A kemi në aq para për të gjuajtur?”. Pastaj, Rugova tha – “Mirë qenka, profesor”. Dhe, u mbyll ky muhabet.
Në atë takim, Surroi ka kërkuar prej Rugovës që të ndërhyjë në Kuvend dhe në Qeveri, sepse kishin filluar lojërat e mëdha.
Në mënyrën më brutale Rugova iu ka përgjigjur - “Veton, rri këtu ku jemi për çka jemi. Kuvendi e di punën e vet, Qeveria e ka të vetën. Ne nuk jemi këtu substituim”.

Express: Është folur në emër të Rugovës shumë, është thënë se e ka lënë me amanet Fatmir Sejdiun, e shumë të tjera... Sikur të ishte gjallë Rugova, do të ndodhnin këto ndryshime?

Nexhat Daci: Jo, nuk do të ndodhte asgjë, në asnjë mënyrë, sepse ka qenë vullnet i tij. Tash po ju zbuloj një të vërtetë të madhe. Në koalicionin e parë me AAK’në, Ramush Haradinaj më thërret mua në mbrëmje, një natë përpara, dhe më thotë - “Profesor, nëse LDK nuk merr qëndrim deri nesër, unë do të marr orientime të tjera”. Unë e di që ka qenë bllof partizançe ajo fjali... E kam dashur dhe e dua. I kam thënë – “Ramush rri rehat, pa të informuar unë, lëri ti lojërat tua”. Dhe, unë kam shkuar, e kam takuar Presidentin Rugova në mëngjes, i kam shpjeguar se jemi munduar mjaftë dhe e kemi orën 12 për të vendosur. I thashë – “E nënshkrove koalicionin, mirë. Nëse nuk e nënshkruan, ditën e mirë, nuk kam më përgjegjësi”.
Presidenti Rugova nuk ka qenë njeri që ka lënë amanete. Unë nuk jam takuar shumë shpesh me të, por në momentet e vështirësive politike, edhe natën më ka thirrur. Nuk kemi folur gjëra intime kurrë. Nuk e them që kam qenë dora e djathtë ose e majtë e tij. Por, unë i kam besuar. Dhe, kam pasur përshtypjen se ai i beson sinqeritetit dhe profesionalizmit tim. Ata që thonë se ka lënë amanete, le t’ju shërbejë për nder kjo. Por, unë nuk e besoj.

Express: Ju bëtë koalicion me Ramush Haradinajn – për ta shpëtuar nga Haga?

Nexhat Daci: Koalicioni është bërë për shkak të simpatisë sime për luftën e Haradinajt.

Express: Por, edhe për ta shpëtuar?

Nexhat Daci: Unë e thashë për luftën e tij, e ajo është pjesë e luftës... Ramush Haradinaj në Kuvend ka treguar një vizion që ishte më progresivi. Ai tregonte kurajo në luftërat e vështira që i kishim natën për Kosovën me institucionet ndërkombëtare. Ai ishte shpesh edhe para meje, me qëndrimet për kompletimin e Qeverisë së Kosovës me ministritë e reja. Ishte një “fighter” që mua më pëlqente në politikë. Ishte pa frikë. Kjo e ka shtuar simpatinë time ndaj tij.

Express: Ju lavdëroheni shpesh për shkollim... E shkollimi juaj me shkollimin e Ramush Haradinajt ka një diskrepancë të madhe. Pra, ka arritur t’ju befasojë për të mirë një njeri me shkollim mesatar?

Nexhat Daci: Gjithmonë për të mirë. Unë jam munduar që t’i lexoj raportet e luftës, sepse kam qenë në Prishtinë tërë kohën. Kam qenë një logjistikë ndoshta më e fuqishmja e UÇK’së në Prishtinë, në zyrën time në Akademi. Të gjitha ndihmat e Luginës së Preshevës janë koordinuar në zyrën time – dhe janë dokumentet për këtë. Kur është kthyer prej terrenit ai ekip, gjithmonë më kanë raportuar për gjendjen në terren. Pra, ekziston një simpati imja gjatë luftës. Kjo ka bërë që të mos u frikësohem kërcënimeve kur jam bërë udhëheqës i listës së LDK’së, atëherë kur askush nuk ka guxuar.

Express: LDK ju ka vënë para topit në zgjedhjet e para?

Nexhat Daci: Këta të dobëtit e LDK’së kurrë nuk më kanë propozuar për të mirë diçka. Unë e kam ditur atë. Vëllai im, që është pak më i vjetër se unë, më pat thënë – “A je ti në vete?”. I kam thënë – “Vëlla, unë nuk jam ushtar i thjeshtë, e kam kaluar atë fazë, unë jam gjeneral që luftoj për principet e mia”.

Express: Kur përmendet emri juaj, ose ka njerëz që nuk ju duan fare, ose ka njerëz që ju adhurojnë tepër. Nuk ka një mes për juve...

Nexhat Daci: Po, sepse unë nuk jam ne mes.

Express: Jeni popullist, zoti Daci?

Nexhat Daci: Mund të jetë, nuk e përjashtoj.

Express: Vazhdimisht po flisni për një mungesë frike që keni përballë të gjithëve. Në seancën e parë Kuvendit, kur u bënë institucionet e para, ju ia ndalët fjalën Hashim Thaçit, i cili sapo kishe dalë nga lufta. As atëherë nuk jeni frikësuar?

Nexhat Daci: Unë kurrë nuk frikësohem. Kurrë nuk jam rrahur më askënd. Asnjë kafshore fuqi fizike nuk e kam pasur. Jam rritur pa prindër. E kam ditur pastërtinë time gjenetike, që Veton Surroi nuk e kupton, e ka bërë një “mixed-up” të kësaj pune, që s’ka lidhje. Unë e kam konstruktin e tillë. E kam ditur forcën e Hashim Thaçit. Dhe, m’i kanë thënë aty, në atë sallë. Por nuk jam frikësuar. Pas kërcënimeve që më janë bërë, kam shkuar në Universitet, pa përcjellje, vetëm, prej Velanisë.

Express: Çfarë kërcënime?

Nexhat Daci: Në seancën e parë, kur ia kam ndalë fjalën.

Express: Ndërkohë ju e keni edukuar Thaçin pak. Kështu mendoni?

Nexhat Daci: Po, të jeni të bindur që po. Asokohe patën ardhur ndërkombëtarët për ta akuzuar Thaçin. Por, ju kam thënë – “Jo, zotërinj, në Kosovë po fillon demokracia”. Ekipi im dhe familja ime e di cilat kanë qenë kërcënimet.

Express: A mund t’i tregoni?

Nexhat Daci: Jo, sepse janë të natyrës më të ultë, fshatarake. Ju kam thënë vetëm faleminderit, unë do ta vazhdoj punën time.

Express: A e keni hapur këtë bisedë me Thaçin, pasi jeni bërë miq?
Nexhat Daci: Jo, as nuk e kam plan. Tash po ju them diçka. Ka disa herë nuk kam parë sinqeritet te ai. Unë jam profesor dhe e di fizionominë e njeriut kur nuk ka sinqeritet. Por, në një takim, ai e ka fituar besimin tim. Jam i bindur se ka qenë më i sinqerti ne jetën e tij.

Express: Kur ka ndodhur kjo?

Nexhat Daci: Kjo ka ndodhur menjëherë pas shkuarjes së Ramush Haradinajt në Hagë dhe pas kthimit të tij nga Haga. Ishte çështja e ndërrimit të Bajram Kosumit...

Express: Pra, është biseduar për ndërrime. Express ka dalë asokohe me artikull se ekzistojnë opsione për ndërrimin e Qeverisë, për të cilin më vonë na kanë akuzuar për shpifje...

Nexhat Daci: Po, po, e di që keni shkruar. Ka qenë shumë ë vërtetë. Po ju tregoj 100 për qind çfarë ka ngjarë në zyrën time. Muhabetet kanë qenë kështu. I kam thënë – “Hashim, nëse do me qenë në lojë i sinqertë me mua, kemi ardhmëri në bashkëpunim, nën këto rrethana -- nuk ka ndryshim të Qeverisë deri në statusin e Kosovës. Ne e kemi një urë të fundit për ta kaluar si Kosovë dhe është dërrasë e lëkundshme, nuk është urë hiç, mos na lëkund atë dërrasë sepse bimë të gjithë dhe e paguan Kosova. Hajde të jemi konstruktiv dhe të punojmë për çështjen që angazhohemi të gjithë, ta pavarësojmë Kosovën”. Dhe, i kam thënë edhe diçka tjetër. “E ke një detyrë, Hashim. Ta ndreqësh punën me Ramush Haradinajn”. Më ka thënë – “Të ndrequra i kemi”. I kam thënë – “Informatat e mia nuk tregojnë kështu. Kur ta ndreqësh me Ramushin, atëherë Daci është shtylla e sigurt dhe përgjithmonë mbyllet trekëndëshi, e llomet nuk hyjnë më në këtë trekëndësh”. Prej atëherë, ai kurrë nuk e ka thyer atë marrëveshje. Ka qenë aq konstruktiv. Sa herë më është dashur ndihma, jo për Dacin, por kemi qenë kriza rreth Rezolutës, ka pasur kriza të presionit ndërkombëtar. Unë mund t’ju them që ishte një përkrahës i fuqishëm i çështjeve për Kosovën, jo personale, jo për mua. Unë nuk kam pirë kafe kurrë diku jashtë me Thaçin, pos në kabinetin tim. Prej asaj dite, mund t’ju them se PDK, në momentet shumë të rëndësishme, është partner që unë mund t’i besoj për çështje politike.
LDK mendon se Daci me Thaçin po bën koalicione ose po bën dhe biznese, në dëm të LDK’ ose të PDK’së. Edhe Thaçi besoj se ka akuza të njëjta brenda partisë për këtë çështje. Por, një gjë është e qartë me sinqeritetin më të madh po ju them. Unë nuk kam kurrfarë biznesi. Le t’i hetojë kush të dojë. Jo Guardia Di Finanza, por Guardia Di Zoti le të hetojë.

Express: A keni biseduar me Guardia Di Finanza?

Nexhat Daci: Jo. Po ta kisha një faculetë korrupsion, unë do të frikësohesha dhe do t’u nënshtrohesha kërcënimeve të të gjitha natyrave. Nëse arrin dikush, për këtë jetë, në Universitet, Në Akademi, në Kuvend, që të thotë se një cigare ose një kafe e kam marrë si mito, le të dalë lirisht e le ta thotë.

Express: Këtë vilë, zoti Daci, prej nga?

Nexhat Daci: Do të ishte mirë të jeni gazetari hulumtuese. Po ju ftoj me sinqeritetin më të madh – lypeni kush e ka ndërtuar.

Express: Behxhet Pacolli...

Nexhat Daci: Lypeni. Hulumtojeni. Bëni gazetari hulumtuese...

Express: Vendimi i Kryesisë së LDK‘së për shkarkimin tuaj ka ndodhur për një ditë me vendimin e AAK‘së për shkarkimin e Kryeministrit Bajram Kosumi.Çfarë mendoni ju, a është dashur të shkojë Kosumi?

Nexhat Daci:Jo, nuk është dashur të shkojë, para statusit.

Express:Por kjo ka qenë një Qeveri jashtëzakonisht joefikase dhe me shumë kritika...

Nexhat Daci: Mund të jemi të pakënaqur me shumëçka. Por, Bajram Kosumi nuk është tërhequr asnjëherë prej programit që të kryhet çështja e statusit Kosovës. Në të gjitha takimet që kemi pasur, ai nuk ka bërë gabime. Kosumi ka mbetur në nivel të nënkryetarit të partisë, mjerisht. Ka menduar se Qeveria është mekanizëm dhe jo partia. Unë nuk kam qenë për ta shkarkuar Bajram Kosumin.

Express: E ministrat?

Nexhat Daci: Kjo nuk është Qeveri imja. Nuk është meny imja. Prandaj, nuk dua as ta komentoj.

Express: A keni koment për Agim Çekun? Si e shihni ju këtë njeri për Kryeministër të Kosovës?

Nexhat Daci: Kam koment të dhimbshëm, sepse është një figurë të cilën shumë e kam respektuar dhe e respektoj. I kam shkuar i vetmi prej institucioneve për t‘i dhënë përkrahje. Jam i vetmi që në Washington, kur e ka pasur shumë pisk punën, e kam përkrahur. Agim Çeku është një profesionist i mrekullueshëm, ka një shkollim të rregullt në profesionin e vet. Ai është treguar i suksesshëm në punën e vet dhe unë i admiroj njerëzit që kanë suksese dhe guxim. I kam shkuar edhe në shtëpi. Dhe, prapë, edhe këtu, kam humbur poenë nga Lidhja Demokratike e Kosovës. Mendoj që një takticist i mirë i luftës ka bërë një gabim ndoshta më të madh se gabimet që unë i kam bërë ndonjëherë në politikë.

Express: Pse konsideroni se ka bërë gabim? Ai synon që ta ndihmojë TMK‘në më shumë si Kryeministër...

Nexhat Daci: Kjo i bie sikur unë të them se do ta ndihmoj shkencën më shumë në Kuvend sesa kur kam qenë në laborator.

(Fund)
_________________
Kenaqesia me e madhe dhe me fisnike qe kemi ne ne kete bote eshte te zbulojme te vertetat e reja dhe pastaj t´i trondisim paragjykimet.